قەدىمىي تارىخىي ماكان – تۈركىستان جۇغراپىيەسى ئىسلامنى قۇبۇل قىلغان 12 ئەسىر ئىچىدە مول ۋە كۈچلۈك تۈركىستان ئىسلام مەدەنىيىتىنى شەكىللەندۈرگەن. جەنۇپتىن شىمالغىچە، شەرىقتىن غەرپكىچە پۈتۈن تۈركىستان جۇغراپىيەسى ھۇنلاردىن باشلاپ، تابغاچلار، كۆكتۈركلەر، ئۇيغۇرلار، قاراخانىيلار، غەزنەۋىيلەر، ھەرزەمشاھ ۋە سەلچۇقلار دەۋرىدە چوڭقۇر يىلتىز تارتىپ، دۇنيا تارىخى ۋە مەدەنىيىتىگە ئۆچمەس ئىزلارنى قالدۇرغان بولسا، قارىخانىيلار دەۋرىدە ئىلىم ۋە مەدەنىيەتتە ئەڭ يۇقىرى پەللىگە يەتكەن ئىدى. بولۇپمۇ، قاراخانىيلار سولتانى ئابدلكەرىم ساتۇق بۇغراخاننىڭ مۇسۇلمان بولىشى بىلەن، بۇ زىمىن ئەخمەد يەسەۋىي، شاھى نەخشەبەندى، ئىمام بۇخارىي، تىرمىزىي، ئىبنى سىنا، فارابىي، بەيرۇنى، خارەزمى، ئۇلۇغ بەگ، يۇسۇپ خاس ھاجىم، مەھمۇد كاشىغەرىي ۋە سانساناقسز ئىلىم-ئىرفان سولتانلىرىنىڭ يۇرتى بولمۇش مۇبارەك زىمىندۇر. ۋەخپىمىز تارىخقا ئىسمىنى ئالتۇن ھەرىپلەر بىلەن يازغان، تۈركلەر ئىرقىنىڭ ئىسلامغا مۇشەررەپ بولىشىغا مۇبارەك ۋەسىلە بولغان، قەبرىسى تۈركىستان جۇغراپىيەسىنىڭ تارىخى پايتەختى قەشقەرنىڭ ئارتۇش شەھرىگە جايلاشقان بۈيۈك تۈرك سولتان ئابدۇكەرىم ساتۇق بۇغراخان ھەزرەتلىرىنىڭ ئۆچمەس نامى ۋە ئارزۇسىنى ئەۋلادلارغا تونۇتۇش، ئەجداد روھىنى ياش نەسىللەرگە يەتكۈزۈش ۋە سىڭدۈرۈش مەقسىتىدە، خەلقپەرۋەر تۈرك ۋە شەرقىي تۈركىستانلىقلار ھەمكارلىقىدا 2012 – يىلى قۇرۇلدى.